काही वर्षांपूर्वी मी गावातला एक स्फोटक फलंदाज म्हणून ओळखला जायचो. म्हणजे अगदी पहिल्या बॉलपासून मी सिक्सर मारायला टपलेलो असायचो. सेटल होणे, पीचचा अंदाज घेणे आदी गोष्टी माझ्या कधीच खिजगणतीत नव्हत्या. प्रत्येक बॉलरला मी माझे गिऱ्हाईक मानायचो. त्यामुळेच अनेकदा मी कित्येक बॉलरांच्या ठिकऱ्या उडविल्या आहेत. मला विरुद्ध टीमवाले जरा वचकूनच असायचे. वर्षभरात खूप क्रिकेट टूर्नामेंट व्हायच्या. आम्ही सगळ्या खेळायचो.
तर एकदा अशीच एका टूर्नामेंटची फ़ायनल चालू होती. मी ओपनिंगला गेलो. समोरून एक धिप्पाड बॉलर बोलिंग करत होता. त्याने तुफान स्पीडमध्ये पहिला बॉल टाकला आणि मी तो पुल करून सीमापार टोलावला. प्रचंड टाळ्या आणि जल्लोष झाला. पुढचे दोन बॉलदेखील मी चौकार मारले. चौथ्या बॉलवर मग मी माझ्या नेहमीच्या स्टाईलने डान्सिंग डाऊन जात लाँगऑनच्या डोक्यावरून त्याला लांब भिरकावला आणि अंपायरने दोन्ही हात वर करून सिक्सर देण्याआधीच ग्राउंडच्या बाहेर जल्लोषात धिंगाणा चालू झाला. चार बॉल अठरा रन्स.!! मी फुल मूडमध्ये होतो. पुढचे दोन्ही बॉलसुद्धा टोलवायचेच या बेतात होतो, तेवढ्यात नॉन-स्ट्राईक वरून नाम्या धावत धावत आला, "अरे येडा झाला का राव्हल्या? एवढ्या एका बॉलरला तरी सांभाळून खेळ. अरे शेवटी हा गण्या बनसोडे आहे गण्या बनसोडे.!" मी शॉक झालो, "काय? हाच का तो गण्या बनसोडे?" गण्या बनसोडे हा तालुक्यातलाच नव्हे तर जिल्ह्यातला एक चांगला बॉलर म्हणून नावाजलेला होता. तो रणजीसुद्धा खेळलेला होता. जहीर खानच्या बरोबर त्याने बोलिंग केलेली होती. जहीर नंतर जिल्ह्यातला सर्वात भारी बॉलर म्हणजे गण्याच. मी फक्त त्याच्याबद्दल ऐकले होते आणि मला नेहमीच त्याला खेळण्याची इच्छा होती. मी त्याला आधी कधी पहिले नव्हते. त्या दिवशी पहिल्यांदा पाहत होतो, आणि ज्याच्या नुसत्या नावाने मोठ मोठे फलंदाज टरकत असत त्याच या गण्याला मी मजबूत फोडला देखील होता.
पुढच्या बॉलवर गण्या रनअप घेत आला आणि त्याने गुड लेन्थवर एक इनस्विंगर टाकला. माझा आवडता चेंडू.!! कारण शंभरातल्या नव्व्याण्णव वेळा मी तो लाँगऑनवरून बाहेर भिरकावून देत असे. पण यावेळी मी तो डिफेंड केला. बॉल पाय आणि बॅटच्या मधून निघाला आणि त्याने माझे फर्निचर उखडून टाकले.
कित्येक वेळा माणसापेक्षा त्याचे नाव जास्त काम करते नाही का? त्या दिवशी नाम्याने मला त्या बॉलरचे नाव गण्या बनसोडे आहे हे सांगितले नसते तर मी अजिबात आउट झालो नसतो याची मला ठाम खात्री आहे.
