संस्कृती

बुलडोझर आले, रोलर फिरले..

विटा, माती, पत्र्यांचे ढिगारे उरले..
.

झाडे कापली, फुटपाथ उसवला... टपरीसकट पानवाला पप्पू आणि राज्या उचलला..!!!

साऱ्या निगडित आठवणींसकट, पीएमटीचा स्टॉप सुद्धा मागे ढकलला..

ती चहापोह्यांची दुकाने, तो इस्त्रीवाला, ... ते सुनील भाऊंचे झेरॉक्स,तो आसिफ चा एसटीडी सारे काढले खणून..

अवाढव्य प्रगतीला आणि बेफाम गर्दीला जागा पुरत नाही म्हणून...

बुलडोझर आले, रोलर फिरले..

विटा, माती, पत्र्यांचे ढिगारे उरले..
.

लांबलेले निरोप.. शेअर केलेल्या सिगरेट्स, न्याहाळलेल्या पोरी..

दुकानांत आपल्या वटवर ठेवलेली.... दोन-चारशेची उधारी..

तो मंतरलेला काळ गेला... काळ्या डांबरात चिणून...

अवाढव्य प्रगतीला आणि बेफाम गर्दीला जागा पुरत नाही म्हणून...

बुलडोझर आले, रोलर फिरले..

विटा, माती, पत्र्यांचे ढिगारे उरले..
.

कट्टा जेव्हा कट्टी घेतो.. आणि आठवण जेव्हा अडचण होते..

तेव्हा विकासकांना काय ठाऊक.. एक संस्कृती लयास जाते...

त्यांनी एक रस्ता रुंदावला.... कित्येक जुन्या वाटा गाडून...

अवाढव्य प्रगतीला आणि बेफाम गर्दीला जागा पुरत नाही म्हणून...

बुलडोझर आले, रोलर फिरले..

विटा, माती, पत्र्यांचे ढिगारे उरले..
.
COEP HOSTEL footpath demolished for road broadening..!!!