रात्र

पुन्हा आली रोजसारखी परतून रात्र,
आजही ठेवावी दावणीला बांधून रात्र.!
हळू हळू ओतावी पापण्यांत अन,
पुन्हा स्वप्नांशी ठेवावी सांधून रात्र.!!

चांदण्यांच्या आभाळकाळ्या मखरात रात्र,
डोळ्यांच्या भिरभिरणाऱ्या पाखरात रात्र.!
पण ती आली की सगळे दरवाजे बंद होतात,
कुणालाच नको असते का आपल्या घरात रात्र.?

हळूहळू सगळ्या समुद्रावर, शहरावर दाटणार रात्र,
वीस वॅटच्या सीएफएल दिव्यांनी किती दूर लोटणार रात्र.!
एवढ्यात लॉगआऊट करू नका रे,
चंद्राची स्माईली घेऊन ऑनलाईन भेटणार रात्र.!

मवाली वस्तीत, पोलिसांच्या गस्तीत भरडणार रात्र,
दव बनून पहाटेला रड रड रडणार रात्र.!
काय दुर्दैव म्हणावे तिचे की,
हा असा एखादा फालतू कवी, कवितेत खरडणार रात्र.!!