म्हणू का

डोळ्यांतून उल्का निसटली त्याला शकुन म्हणू का 

मनातल्या हळव्या उधाणाला तुझीच खुण म्हणू का

तुला वजा केल्यावरती उरते जे काही माझ्यात बाकी

अस्तित्वाच्या त्याच अवस्थेला मी न्यून म्हणू का

असे नाही की नैतिकतेचे पाश मी लावत नाही मनाला 

तुझ्यासाठीच्या अनावर ओढीला मी अवगुण म्हणू का

तू जाणूनबुजून संभ्रमाच्या ढगाआड दडवतेस सूर्य

तुझ्या नजरेच्या सूचक कटाक्षालाच मी ऊन म्हणू का

जन्मजन्मांतरीचे साकडे नाही घालणार मी तुला 

फक्त एकदा तुझ्याशी माझे नाव जोडून म्हणू का

..