चांदण्यात फिरताना

चल या चांदण्यात थोडे फिरू

मनाच्या किनाऱ्यावरची चमकती रेती
चेहऱ्यावर माळून घेऊ

डोळ्यांतून समुद्र काढून ठेवू एखाद्या बेटावर,
पाण्यातल्या चंद्रबिंबात वितळून उतरू
आणि पोचू क्षितिजापारच्या कोण्या तारकापुंजावर

थोडे गुरुत्वाकर्षण उधार घेऊ एखाद्या ताऱ्याचे
आणि मग गुंफून जाऊ एकमेकांत कायमचे

तू अवकाशीय लहरींची गाणी गुणगुणत रहा
आणि मी तोपावेतो थोडा पुढे जाऊन
व्होयाज़रच्या तबकडीवर लिहून येईल
आपल्या दोघांची नावे

कुठेतरी अंतराळाच्या अंतरंगात बनवू
आपल्या स्वप्नांचे एक छोटे वार्महोल
आणि पोचू त्यातून
एखाद्या सूक्ष्मतेच्या अनंत नाभिकीय प्रारणात

तिथे काही आवेगी क्वांटम उत्सर्जने पिऊ
आणि पुन्हा परतु आपल्या किनाऱ्यावर

तुझा हात हातात राहू दे चांदण्यात फिरताना



...